Mkazi wa kijiji cha Madangwa, wilayani Lindi, Omari Said Bakari (35), amekutwa amefariki dunia kwa kujinyonga kwa kutumia mkanda wa suruali yake, baada ya kuufunga kwenye tawi la mti wa mkorosho kisha kujining’iniza. Tukio hilo la kusikitisha limetokea Julai 22, 2025 majira ya saa tatu asubuhi.
Kwa mujibu wa taarifa iliyotolewa na Jeshi la Polisi mkoa wa Lindi, tukio hilo limethibitishwa na uchunguzi wa awali umeonesha kuwa marehemu alikuwa akipitia hali ya msongo wa mawazo kwa muda mrefu. Ndugu wa karibu pamoja na majirani waliokuwa wakiishi naye wameeleza kuwa hali hiyo huenda ndiyo iliyomsukuma kuchukua uamuzi huo mgumu.
Jeshi la Polisi limeeleza kuwa hakuna dalili za tukio hilo kuhusishwa na vitendo vya uhalifu, na kwamba uchunguzi zaidi unaendelea ili kubaini kwa undani sababu za kisaikolojia au kijamii zilizochangia hatua hiyo. Aidha, limesisitiza umuhimu wa jamii kuimarisha usaidizi wa kisaikolojia kwa watu wanaoonesha dalili za msongo wa mawazo au matatizo ya kiakili.
Mwili wa marehemu tayari umekabidhiwa kwa familia yake kwa ajili ya taratibu za mazishi. Jeshi la Polisi limewataka wananchi kutoa taarifa mapema wanapobaini mtu anapitia hali ngumu ya kisaikolojia, ili kusaidia kuzuia matukio kama hayo yasitokee tena.