Jeshi la anga la Israel limechukua hatua kali dhidi ya marubani wa akiba waliotoa wito wa kuachiliwa kwa mateka wa Israel wanaoshikiliwa katika Ukanda wa Gaza, kwa kuamua kuwafuta kazi kutoka kwenye jeshi hilo. Taarifa hiyo imetolewa leo na afisa mmoja wa jeshi hilo, akizungumza na shirika la habari la AFP.
Afisa huyo amesema kuwa uamuzi huo umeungwa mkono kikamilifu na mkuu wa majeshi pamoja na kamanda wa jeshi la anga la Israel. Hatua hiyo inajibu barua ya wazi iliyotiwa saini na takriban wanajeshi 1,000 wakiwemo marubani wa akiba na waliostaafu, ambayo ilionekana kwenye vyombo vya habari na kutoa wito wa kuchukuliwa hatua za kuwarejesha nyumbani mateka hao.
Kwa mujibu wa afisa huyo, wanajeshi wote waliotia saini barua hiyo hawataruhusiwa tena kuendelea kuhudumu katika jeshi la anga la Israel.
Katika muktadha huo huo wa mzozo unaoendelea, mashambulizi ya anga ya Israel yameripotiwa leo kuua Wapalestina wapatao 23 katika jengo moja la ghorofa lililolengwa katika Ukanda wa Gaza. Mashambulizi hayo yanaendelezwa huku hali ya kibinadamu ikizidi kuwa mbaya katika eneo hilo linalokumbwa na mzozo wa muda mrefu kati ya Israel na Hamas.