Katika maandalizi ya onyesho kubwa la msanii nguli wa hip-hop, Kanye West, nchini México, taarifa zimeonyesha kuwa takriban asilimia 95 ya tiketi zote tayari zimekwisha kuuzwa, ikiwa ni ishara tosha ya ukubwa wa hamasa kutoka kwa mashabiki.
Onyesho hilo linalotarajiwa kufanyika katika ukumbi wa kihistoria wa “Plaza de Toros” limeonekana kuwa kivutio kikubwa, huku mashabiki wakifurika kununua tiketi mapema zaidi ya mwaka kabla ya tukio lenyewe. Ripoti zinaonyesha kuwa mauzo hayo yameingiza zaidi ya dola milioni 12—sawa na takriban Tsh bilioni 29.4—kiasi kinachoonesha upepo mzuri wa kibiashara unaomzunguka Kanye licha ya misukosuko ya hivi karibuni katika maisha yake ya umaarufu.
Wadadisi wa muziki wanasema kuwa mafanikio haya ya awali yanaweza kuwa ishara ya kurejea kwa Kanye West kwa kishindo katika majukwaa ya kimataifa. Onyesho hilo limetajwa kuwa miongoni mwa matukio makubwa zaidi ya muziki yanayotarajiwa kufanyika Amerika ya Kati mwaka 2026.
Kwa mujibu wa ratiba iliyotangazwa, Kanye anatarajiwa kutumbuiza nchini humo tarehe 30 Januari, mwaka 2026, huku ikisemekana kuwa atawasilisha mseto wa nyimbo zake mpya na zile zilizomtambulisha kama mmoja wa wasanii wabunifu zaidi katika kizazi chake.