Polisi nchini Kenya wameanzisha uchunguzi baada ya kumkamata mwanaume mmoja aliyekuwa ameanzisha kituo cha doria cha polisi bila idhini ya Huduma ya Kitaifa ya Polisi (NPS).
Mtuhumiwa huyo, Collins Leitich, anayejulikana pia kama Chepkulei, anadaiwa kuanzisha kituo hicho ndani ya jengo alilopaka rangi rasmi za polisi, akilifanya lionekane kama kituo halali cha usalama. Ugunduzi wa kituo hicho feki ulifanywa na mamlaka za eneo hilo baada ya kupata taarifa kutoka kwa wakazi, na mara moja hatua za uchunguzi zikaanza.
Baadhi ya wakazi wa eneo hilo walieleza mshangao wao baada ya kugundua kuwa kituo hicho hakikuwa rasmi. “Tulidhani ni mpango halali wa kuboresha usalama katika eneo letu,” alisema mmoja wa wakazi.
Hata hivyo, polisi bado hawajajua dhamira ya mtuhumiwa kuanzisha kituo hicho bila idhini. Mamlaka zimewahakikishia wananchi kuwa hatua stahiki zitachukuliwa huku uchunguzi ukiendelea.
Akamatwa kwa Kuanzisha Kituo Feki cha Polisi Nchini Kenya
