Tarehe 24 na 25 Januari 2026, Shirikisho la Viwanda Tanzania (CTI) liliandaa ziara ya siku mbili na Kamati ya Kudumu ya Bunge ya Viwanda, Biashara, Kilimo na Mifugo, ikiongozwa na Mheshimiwa Deodatus Mwanyika, kutembelea kampuni za wanachama wa CTI, Tanzania Cigarette Company (TCC), Tanzania Breweries Limited (TBL), na ALAF Tanzania Limited.
Ziara hii imelenga kuimarisha mazungumzo kati ya Bunge, Serikali, na Sekta Binafsi, kwa kuwapa Waheshimiwa Wabunge fursa ya kuelewa na kujionea moja kwa moja shughuli za uzalishaji viwandani, mazingira ya uwekezaji, fursa, pamoja na changamoto zilizopo katika sekta ya viwanda nchini.
Kupitia ziara hizi, Kamati ilipata uelewa wa mchango mkubwa wa viwanda katika ukuaji wa uchumi wa Taifa, uundaji wa ajira rasmi, uongezaji thamani wa malighafi za ndani, pamoja na nafasi ya sera thabiti katika kuchochea uwekezaji endelevu.
Vilevile, wamiliki wa viwanda waliwasilisha changamoto za kiutendaji, kikodi, na ushindani wa bidhaa za ndani, huku wakitambua juhudi za Serikali katika kuboresha mazingira ya biashara.
Ziara hii pia ilisisitiza umuhimu wa sera zenye uthabiti na utabiri, mapambano dhidi ya bidhaa haramu, uimarishaji wa mifumo ya kodi na biashara, pamoja na mchango wa viwanda katika uwajibikaji wa kijamii, maendeleo ya rasilimali watu, na uwezeshaji wa wanawake na vijana.
CTI imeendelea kuthibitisha dhamira yake ya kuwa kiungo madhubuti kati ya Serikali na Sekta ya Viwanda, ikihamasisha maamuzi ya sera yanayotokana na ushahidi wa vitendo na mahitaji halisi ya wazalishaji kwa lengo la kujenga uchumi shindani, jumuishi, na unaotegemea uzalishaji na uongezaji thamani