Katika mkutano mkuu maalum wa Chama Cha Mapinduzi (CCM), wajumbe wameridhia kwa kauli moja kumchagua Balozi Dkt. Emmanuel Nchimbi kuwa mgombea mwenza (Makamu wa Rais) kwa mgombea urais Dkt. Samia Suluhu Hassan katika uchaguzi mkuu wa mwaka 2025.
Uamuzi huu umefikiwa baada ya mjadala wa kina na ni ishara ya mshikamano ndani ya chama kuelekea uchaguzi mkuu. Dkt. Nchimbi, ambaye ni Katibu Mkuu wa CCM Taifa, anatarajiwa kuwa na mchango mkubwa katika kuimarisha sera za chama na kuendeleza maendeleo yaliyopatikana katika kipindi cha awamu ya Rais Samia Suluhu Hassan.
“Chama chetu kimejidhatiti katika kuhakikisha uongozi wa wananchi unapata viongozi bora na wenye uwezo wa kuendeleza agenda za maendeleo. Uamuzi huu wa kumchagua Dkt. Nchimbi ni uthibitisho wa dhamira yetu ya kusimamia mustakabali wa taifa letu,” alisema mmoja wa wajumbe wa mkutano mkuu.
Kauli mbiu kama #KaziIendelee na #VitendoVinaSauti zimeendelea kusikika kwenye mitandao ya kijamii, zikisisitiza haja ya kuhakikisha uchaguzi huu unaleta mabadiliko na maendeleo endelevu kwa taifa.
Uamuzi huu ni hatua kubwa katika maandalizi ya uchaguzi mkuu wa 2025, ambapo CCM inatarajia kuendeleza utawala wa maendeleo na ustawi wa wananchi.
Dkt. Nchimbi Mgombea Mwenza wa Rais Samia Uchaguzi 2025
