Nahodha wa Liverpool na beki tegemeo wa Uholanzi, Virgil van Dijk amekubali kuongeza mkataba mpya wa miaka miwili na klabu hiyo, hatua inayomaliza uvumi uliodumu kwa miezi kadhaa kuhusu mustakabali wake.
Mkataba huo mpya utamuweka Anfield hadi mwisho wa msimu wa 2026–2027.
Kwa mujibu wa taarifa za hivi karibuni, Van Dijk alikuwa katika mazungumzo na Liverpool kuhusu kuongeza mkataba wake, ambao ulikuwa unamalizika Juni 2025.
Kocha mkuu Arne Slot alieleza matumaini yake ya kuendelea kufanya kazi na Van Dijk kwa muda mrefu, akisisitiza umuhimu wa beki huyo kwa kikosi cha Liverpool.
Tangu ajiunge na Liverpool Januari 2018 kutoka Southampton kwa ada ya £75 milioni, Van Dijk amekuwa nguzo muhimu katika mafanikio ya klabu hiyo.
Van Dijk amecheza mechi 277 na kufunga mabao 24, akisaidia timu kushinda Ligi ya Mabingwa Ulaya, Ligi Kuu ya England, FA Cup, Carabao Cup, na Kombe la Dunia la Klabu.
Kusaini kwa Van Dijk ni habari njema kwa Liverpool, hasa baada ya Mohamed Salah pia kuongeza mkataba wake wa miaka miwili.
Hata hivyo, klabu inakabiliwa na changamoto ya kumshawishi Trent Alexander-Arnold kusalia, kwani mchezaji huyo anaripotiwa kuvutiwa na Real Madrid.
Kwa sasa, Liverpool inaongoza Ligi Kuu ya England kwa tofauti ya pointi 11, ikiwa na matumaini makubwa ya kutwaa taji la 20 la ligi kuu ya Uingereza.
Uwepo wa Van Dijk na Salah unatoa msingi imara kwa timu kuendelea kuwa na ushindani mkubwa katika mashindano mbalimbali yanayoikabili Liverpool.