Klabu ya Soka ya Mtibwa Sugar, yenye makazi yake Manungu, Turiani, Morogoro, imefanikiwa kurejea Ligi Kuu ya NBC kwa msimu wa 2025/2026 baada ya kushuka daraja mwishoni mwa msimu wa 2023/2024.
Katika msimu wa 2024/2025 wa NBC Championship League, Mtibwa Sugar ilionyesha ufanisi mkubwa ambapo hadi sasa wamecheza mechi 28 na kujikisanyia alama 67 ikiwa ndio kinara wa ligi, ikiwapiku wapinzani wao wa karibu, Mbeya City na Stand United.
Baada ya kushuka daraja, Mtibwa Sugar ilijipanga upya kwa msimu wa 2024/2025 wa NBC Championship League. Licha ya changamoto kadhaa, ikiwa ni pamoja na kupoteza baadhi ya mechi dhidi ya timu kama Geita Gold na Kiluvya FC, klabu hiyo ilionyesha ustahimilivu na kuendeleza ushindani mkali dhidi ya wapinzani wake.
Ushindi muhimu, kama ule dhidi ya Mbeya City kwa mabao 3-1, uliimarisha nafasi yao ya kurejea Ligi Kuu .
Kurejea kwa Mtibwa Sugar katika Ligi Kuu ya NBC ni habari njema kwa mashabiki wa soka nchini, hasa wale wa mkoa wa Morogoro.
Klabu hiyo ina historia ndefu katika soka la Tanzania na imekuwa ikitoa mchango mkubwa katika kukuza vipaji vya wachezaji wa ndani. Urejeo wao unatarajiwa kuongeza ushindani katika ligi na kuleta msisimko mpya kwa mashabiki.
Kwa sasa, mashabiki wa Mtibwa Sugar wana kila sababu ya kusherehekea mafanikio haya na kujiandaa kwa msimu ujao wa Ligi Kuu ya NBC, ambapo klabu yao itakuwa ikipambana na vigogo wa soka la Tanzania kama Young Africans, Simba SC na Azam FC.