Hatimaye sintofahamu iliyozunguka dabi ya Kariakoo imehitimishwa. Klabu ya Yanga SC imeweka alama ya mwisho katika msimu wa 2024/25 kwa ushindi wa mabao 2-0 dhidi ya Simba SC, na kutawazwa mabingwa wa Ligi Kuu Tanzania Bara kwa mara ya nne mfululizo.
Mechi hiyo iliyochezwa katika mazingira ya hali ya juu ya tahadhari na mashaka, ilichezeshwa baada ya kuahirishwa mara kadhaa, huku ikihusisha vikao vya ngazi za juu na hata uingiliaji wa Rais wa Jamhuri ya Muungano wa Tanzania, Samia Suluhu Hassan.
Katika mchezo huo wa 184 wa kihistoria kati ya watani wa jadi, kipindi cha kwanza kilimalizika bila kufungana, lakini Yanga walionekana kudhibiti mchezo zaidi. Bao la kwanza lilifungwa kupitia mkwaju wa penalti uliotolewa baada ya kipa wa Simba, Moussa Camara, kumwangusha Pacôme Zouzoua dakika ya 63. Zouzoua mwenyewe hakufanya makosa, akiipa Yanga uongozi wa 1-0.
Simba walijaribu kurudi mchezoni, lakini mashambulizi yao hayakuzaa matunda. Yanga waliendeleza kasi na dakika ya 86, Clement Mzize akafunga bao la pili kwa kumalizia pasi ya Zouzoua, na kufunga rasmi ukurasa wa ushindi wao.
Ushindi huu umeifanya Yanga kumaliza ligi na alama 82, huku Simba wakibaki na 78, na kuthibitisha utawala wao wa soka la Tanzania kwa msimu wa nne mfululizo.
Mabadiliko kadhaa yameshuhudiwa katika uongozi wa Bodi ya Ligi, ikiwa ni pamoja na kujiuzulu kwa Mwenyekiti wa TPLB na kusimamishwa kwa Mtendaji Mkuu wake, hali iliyozidisha mvutano kabla ya mchezo.
Kwa matokeo haya, Yanga SC wameandika historia nyingine kubwa katika soka la Tanzania, wakithibitisha ubora wao si tu kwa ushindi dhidi ya watani wao, bali pia kwa kulinda taji lao kwa mafanikio makubwa.
Yanga Yamaliza Utata wa Derby Kwa Kuichapa Simba Sc 2-0