Msanii maarufu wa filamu na mwanamitindo nchini Tanzania, Jacqueline Wolper, amethibitisha rasmi kuachana na mzazi mwenzake, Rich Mitindo, anayejulikana pia kama Baba P. Kupitia ukurasa wake wa Instagram, Wolper ameeleza kuwa kwa sasa yuko katika mchakato wa kutafuta talaka, na kuwataka mashabiki wake na umma kwa ujumla kuepuka kumhusisha na masuala yoyote yanayomhusu mume wake wa zamani.
Katika ujumbe wake uliojaa hisia, Wolper aliandika:
“Mimi na mzazi mwenzangu Rich (Baba P) hatupo pamoja (TUMEACHANA). Nipo kwenye process za Divorce/Talaka. Hivyo, mashauri yote na huruma juu ya mambo yanayoendelea na mzazi mwenzangu, msiyalete kwangu tena. Ni mtu ambae yupo huru kufanya chochote kinacho mpendeza.”
Habari za kuachana kwa wawili hao zimeibua hisia tofauti miongoni mwa mashabiki wao, hasa ukizingatia kwamba ndoa yao ilifungwa Novemba mwaka 2022 na walibahatika kupata mtoto mmoja wa kiume pamoja. Mashabiki wengi walikuwa wakivutiwa na maisha yao ya ndoa, ambayo mara kwa mara yalionekana kupambwa na furaha na upendo kwenye mitandao ya kijamii.
Hata hivyo, Wolper ameweka wazi kuwa hatua hii ni ya mwisho na amedhamiria kuendelea mbele na maisha yake. Alisisitiza kwamba kila mmoja sasa ana uhuru wa kuendelea na maisha yake anavyopenda bila kuingiliana.
Kwa sasa, mashabiki wameonyesha mshikamano wa kumpa nguvu Wolper wakati huu mgumu wa maisha yake. Baadhi ya wachangiaji katika ukurasa wake wa Instagram wamemtia moyo kwa kumpongeza kwa ujasiri wa kuchukua hatua ya kulinda amani yake ya nafsi.
Kwa upande wake, Rich Mitindo hajatoa tamko lolote rasmi kuhusu tangazo hilo. Hata hivyo, wengi wanatarajia kwamba wawili hao wataendelea kushirikiana vyema katika malezi ya mtoto wao licha ya kutengana kwao.
Hii ni moja ya changamoto ambazo watu mashuhuri mara nyingi hukutana nazo, ambapo mahusiano yao hushughulikiwa hadharani. Hata hivyo, hatua ya Wolper ni mfano wa jinsi mtu anaweza kusimamia maisha yake ya kibinafsi licha ya changamoto zinazotokana na umaarufu.